<?xml version="1.0" encoding="UTF-8"?><song><hymn_number>30</hymn_number>
<title>Titles of Christ ƲIT30</title>
<lyrics>[V1]
 Chisʋs okʋt pin Chitokaka yoke;
 Himak a̱ eho hoyashke;
 Hʋpi chu̱kʋsh a̱ mominchi pulla hosh,
 Pit iloh im ilbʋshashke.

[V2]
 Chisʋs okʋt ʋba pi̱ Mi̱ko yoke;
 In tʋshka e toyubakmʋt,
 Ai a̱hli biekʋt, achunanchi hosh,
 Il im antia pullashke.

[V3]
 Chisʋs okʋt pi Okchalinchi yoke;
 Hatak yoshoba pia kʋt,
 Na̱ pi Okchalinchi ilʋppak oka
 Il anukcheto pullashke.

[V4]
 Chisʋs okʋt na̱ pi Apela yoke;
 Hatak ilbʋsha pia kʋt
 Il okpʋnit e taiyahli tuk kia,
 Falamʋt il im onashke.

[V5]
 Chisʋs okʋt pin Tikba-heka yoke.
 Il iakaiya hokma o̱,
 Ai ahanta holitopa fehna 'no
 Pisht ona he bano hoke.

[V6]
 Chisʋs okʋt pi Pehliechi yoke;
 Eho holitobli pullʋt,
 Na̱ pim apihi̱sa tok moma hoka
 Iloh aiokpahanchashke.

[V7]
 Chisʋs oka il Aiokcha̱ya yoke
 Yʋmohmi ak inli kia,
 Kil i̱ yimmot, peh e shitilemakmʋt
 Ilbʋshʋt pilla hi oke.

[V8]
 Chisʋs okʋt, &quot;Okhissa sia hoke;
 Ʋno ʋm a chukowakmʋt
 Okcha̱ya hi oke;&quot; ahanchi tok a̱,
 I̱ yimmit keho chukowa.

[V9]
 Chisʋs ʋt Hina hanta a̱hli yoke;
 Micha Aiokcha̱ya yoke;
 Yʋmohmi hoka il i̱ hullo fehnʋt,
 E halʋlli puyullashke.

[V10]
 Chisʋs ʋt na̱ pim Apesa he mak o̱
 Itikba il ona chi̱shke;
 Nana puta pim ʋlhtaiyaha tukma
 Pi okchalincha hi oke.</lyrics>
<time_sig>11.8.11.8.</time_sig>
<aka>Chisʋs okʋt pin Chitokaka yoke</aka>
<author>Loring S. Williams</author>
</song>